Shumë më i zgjatur, por vetëm pak më i rëndë, modeli SUV i përtej alpeve, ka një bagazh më voluminoz
1.2 Pure Tech Eat6 GT Line
MOTORI – L3 turbobenzinë 1.199 cm3
FUQIA MAKSIMALE – 96 kW (130 kf)
MOMENTI PËRDREDHËS – 230 Nm në 1.750 xhiro/min
TRAKSIONI – në rrotat e para
KAMBIO – automatike me 6 marshe
0-100 km/h – 10,4 s
KONSUMI MESATAR – 19,2 km/l
PËRMASAT – gjat. 464 – gjer. 184 – lart. 165 cm
PESHA – 1.317 kg
ÇMIMI – duke filluar nga 34.050 €
PËR TЁ LËNË VEND edhe për dy pasagjerë të tjerë, gjatësia është rritur, dhe jo pak: 19 (16,5 prej të cilëve në hap) janë centimetrat që e ndajnë në gjatësi modelin 5008 nga “motra e vogël” 3008, nga e cila trashëgon jo thjesht skemën mekanike. Ndërkohë që rreshti i tretë i sediljeve mbetet (si zakonisht), i vështirë në akses, me gjatësinë e re, modeli SUV i përtej alpeve, ka fituar shumë në prakticitet: rreshti i dytë i sediljeve është i përbërë nga tre ndenjëse të ndara, rrëshqitëse dhe të palosshme. Bagazhi, që mund të konfigurohet në mënyra të ndryshme, karakterizohet nga një vëllim rekord: 780 litra të deklaruara nga kompania franceze, e si të mos mjaftonte kjo, dy sediljet e fundit edhe mund të hiqen plotësisht. Pjesa e përparme e kabinës është identike me atë të modelit 3008, duke shpalosur vetitë hi-tech të saj në konfigurimin e instrumenteve, ekranin e madh me prekje dhe tastierën e kontrolleve kryesorë, që ngjan me tastet e një pianoje. Sa u përket motorëve nuk ka ndryshime, duke filluar nga motori 1.2 turbobenzinë, tek ai turbodiesel dy litra, 180 kf. Dallimet lidhen me shasinë, me kalibrim më të ngurtë të sustave dhe amortizatorëve të pasmë, e cila sjell reagim më të thatë në rrugë të drejtë. Ky është në thelb i vetmi ndryshim i perceptueshëm në rrugë, pjesa tjetër është e ngjashme me atë të modelit 3008: jo e shpejtë si rrufe gjatë ndryshimit të drejtimit, modeli SUV Peugeot mbetet i saktë kur hyn në kthesë dhe në ruajtjen e drejtimit, sidomos në shpejtësi. Izolimi akustik i kabinës është për t’u vlerësuar, duke siguruar kështu rehatinë e pasagjerëve. Në të njëjtën mënyrë shfaqen dallimet në performancë mes tij dhe modelit 3008, ndonëse modeli voluminoz 5008 peshon vetëm 60 kg më shumë se ai 3008. Sa për çmimin, me të njëjtin motor dhe pajime, diferenca është vetëm 2000 euro.