Bateritë më të mëdha e bëjnë një makinë të vërtetë elektrike. E qetë dhe e këndshme si përherë, por me bagazh më të vogël
Hybrid
MOTORI – L4 benzinë 1.798 cm3
FUQIA MAKSIMALE – 72 kW (98 kf)
MOTORI ELEKTRIK 1 – 22,5 kW (31 kf)
MOTORI ELEKTRIK 2 – 53 kW (72 kf)
FUQIA E SISTEMIT – 90 kW (122 kf)
TRAKSIONI – në rrotat e para
KAMBIO – E-Cvt
0-100 km/h – 11,1 s
KONSUMI MESATAR – 100 km/l
PËRMASAT – gjat. 465 – gjer. 176 – lart. 147 cm
PESHA – 1.605 kg
ÇMIMI – i papërcaktuar
NJЁQIND KILOMETRA me një litër. Bën përshtypje kjo e dhënë homologimi e modelit Toyota Prius në versionin Plug-in. Edhe pse, siç e kemi thënë qindra herë, realiteti në rrugë është shumë ndryshe. Në fund të testimit, në kompjuterin e kabinës u shfaq një tjetër shifër: 31.3 km/litër, e cila është megjithatë e kënaqshme, për një udhëtim të shpejtë/të përzierë, jo të favorshëm për makinat hibride. Bateritë ndikojnë në arritjen e një rezultati të tillë, të cilat në rastin e modelit plug-in janë shumë më të mëdha se ato të modelit normal Prius. Toyota Prius Plug-in mund të përshkojë më shumë se 50 km në modalitetin elektrik, sipas deklaratave të kompanisë. Edhe në variantin me “rikarikim”, japonezja ofron drejtim të qetë dhe të lehtë, por të këndshëm.
Krahasuar me modelin normal Prius hibrid, mund të zgjidhet mes disa modaliteteve: nëse tek modaliteti HV vëmendja është përqendruar tek performanca, tek ai EV City, fuqia reduktohet për t’i lënë vend autonomisë elektrike. Në testimin jashtë qytetit, me modalitetin EV, u kaluan 135 km/h, të deklaruara nga Toyota: sigurisht, në këtë mënyrë, ngarkesa 8.8 kWh e baterive me jone litiumi, reduktohet me shpejtësi. Sapo kjo ngarkesë shteron, modaliteti kthehet në atë të një hibridi normal. Për të rikarikuar bateritë, ideal është përdorimi i kolonës: me prizë Mennekes, karikimi i plotë i tyre bëhet për vetëm dy orë. Fuqia totale, 122 kf, është e njëjtë me atë të modelit tjetër Prius: pra, performanca është normale, edhe pse e përshtatur me llojin e makinës. Kjo edhe për shkak se modeli Plug-in është dhjetë centimetra më i gjatë, si dhe më i rëndë. Kapaciteti i bagazhit bie në 360 litra, pikërisht për shkak të madhësisë së baterive.