Formula 1 përgatitet të rikthehet në Evropë me ndalesën e parë në kontinent që do të jetë në Barcelonë.
Për Cmimin e Madh të Spanjës, në Maranello është punuar ndërkohë që Ferrari të zbresë në pistë me disa ndryshime aerodinamike që mund ta afrojnë edhe më shumë në luftën ndaj Mercedes. Megjithatë Sebastian Vettel nuk preferon të nxitohet me parashikime, teksa pranon se kokëkuqja do të qëndrojë në ndjekje të skuadrës gjermane edhe për pak kohë.
“Po përpiqemi dhe po bëjmë çmos që ta bezdisim Mercedes. Duhet t’i ndjekim hap pas hapi për t’u hedhur në sulm menjëherë dhe për të përfituar nëse gabojnë, por gjithashtu është e rëndësishme që mos të parakalohemi nga të tjerët”.
Rezultatet e deritanishme e kanë kënaqur gjermanin që erdhi te Ferrari pas një viti të vështirë me Red Bull.
“Me testet e dimrit kemi hedhur një hap përpara, por do të na duhet pak kohë që të arrijmë aty ku ndodhet Mercedes. Ata kanë ende paketën më të fortë në Formula 1 dhe ky disavantazh që ekziston nuk mund të rikuperohet menjëherë”.
