Sallonet e Detroit-it dhe Las Vegas-it kanë stimuluar prodhuesit japonezë, me koncepte interesante në nivelin e stilit, komoditetit në kabinë dhe asistencës në drejtim
Mes salloneve të Las Vegas-it dhe Detroit-it, nuk mund të thuhet se kompanitë japoneze kanë shpërdoruar mundësitë. Kjo, si në fushën e projektimit, ashtu edhe në atë të teknologjive të asistencës në drejtim, gjithnjë e më shumë strategjike në “vitrinat” e sotshme (dhe akoma më shumë te ato të së nesërmes). Në veçanti, duke folur për stilin, konceptet që do të propozojmë në këto faqe, të realizuar nga Nissan, Lexus, Honda dhe Infiniti, tregojnë versione interesante, ndonëse trajtojnë zhanre krejtësisht të ndryshme. Fillohet nga “e ashpra” T-Suv Nissan Xmotion kompakte, me pamje “të egër”, deri tek luksozja LF-1 Limitless, modeli më i mirë i Lexus-it të ardhshëm.
SHUMЁLLOJSHMЁRI ZGJIDHJESH
Ka vend edhe për veturat, me linjat e pastra të Q Inspiration, për të kaluar tek transformimi i pësuar nga Insight, hibridja aspak banale. Madje edhe mes motorëve nuk mungon llojshmëria: turbobenzinë pa “ndihmë” elektrike, hibrid, me shumë zgjidhje (Lexus). Shkurtimisht, kompanitë japoneze tregojnë shenja të një zgjimi proaktiv, dhe jo vetëm në nivel estetik. Përveç sistemeve të asistencës në drejtim, tashmë të pashmangshme, të fokusuara si minimum në reduktimin e stresit të atij që është pas timonit, pa e zëvendësuar krejtësisht njeriun, ka nga ata (lexo Nissan) që kanë hapur një dritare drejt një të ardhmeje edhe më interesante, me Brain-toVehicle. Për çfarë bëhet fjalë? E thjeshtë (me fjalë): një sistem i aftë të interpretojë sinjalet që vijnë nga truri i njeriut. A do të ketë të ardhme një gjë e tillë? Këtë do e tregojnë koha dhe rezultatet.
MAKINA DREJTOHET NGA MENDIMI
Një gjë është ndihma për drejtuesin dhe një gjë tjetër është interpretimi i sinjaleve që vijnë nga truri i tij. Si në filma? Jo edhe aq. Nissan, me teknologjinë Brain-to-Vehicle (B2V), ka paraqitur një software të aftë të “lexojë” valët e trurit të atij që është në timon dhe t’i transformojë ato në veprime. E gjithë kjo për të reduktuar kohën e reagimit ndaj komandave (nga 0.2 në 0.5 sekonda më shpejt). B2V shfrytëzon për herë të parë në një makinë, teknologjinë e deshifrimit cerebral për të parashikuar veprimet e drejtuesit (drejtim, frenim ose të tjera) në drejtim manual, si dhe për të njohur ndonjë shqetësim të drejtuesit në drejtimin autonom (si p.sh. padurimin), duke përshtatur kështu stilin e drejtimit.
NISSAN XMOTION
Spikat koncepti i Nissan-it kompakt, me stilin e tij të guximshëm dhe të “egër”, të theksuar edhe më shumë nga mbrojtëset e shumta. Kabina ofron një skemë “4+2” të vendosur në tre radhë, nga të cilat e fundit është e përshtatshme për fëmijët. Plot shtatë janë monitorët, disa prej të cilëve të komandueshëm me anë të gjesteve apo lëvizjes së syve, si p.sh. sistemi infotainment.
LEXUS LF-1 LIMITLESS
Stil, performancë, emocion dhe hapësirë në këtë prototip crossover-i të gjatë pesë metra, e gjitha e bashkuar në një të tërë, për të dhënë parashikimin stilistik se si do të jetë më e mira e markës. Në të gjejmë një pjesë të përparme të mprehtë, me fenerë të hollë Led, si dhe një profil të suksesshëm, në sajë të kofanos me hap të gjatë. Modaliteti Chauffeur lejon të drejtohet pa i mbajtur duart në timon, duke qenë se ky modalitet menaxhon sistemin e drejtimit, shpejtësisë, dritave dhe frenave. Siç e thotë edhe vetë emri, “pa kufizime”, LF-1 është i përshtatshëm për të pasur çdo lloj motori, që nga ai hibrid tek ai elektrik, madje deri tek teknologjia fuel cell.
PROTOTIPI HONDA INSIGHT
Pas katër vitesh, në formën e një koncepti, rikthehet Honda Insight, që ndryshon pamje, duke u bërë veturë. Po aq, ajo ndryshon edhe nën lëkurë, duke përshtatur motorin hibrid të serisë: kombinon motorin elektrik me një motor 1.5, me benzinë dhe me cikël Atkinson, më shumë për të karikuar baterinë prej litiumi. Nuk do të jetë e pranishme në tregjet europiane.
INFINITI Q INSPIRATION
Në një botë modelesh Suv me bateri, Infiniti propozon vizionin e ardhshëm të një veture mesatare sportive, të vënë në lëvizje nga një motor turbo me raport shtypje të ndryshueshëm. Bëhet fjalë për motorin me katër cilindra VC-Turbo me benzinë, i cili kombinon, sipas nevojave, traksionin dhe efiçencën. Makinë coupé me katër dyer, shfaqet minimaliste edhe në brendësi. Niveli 4 i teknologjive ProPilot, i jep drejtuesit mundësinë të rimarrë komandat.