E prezantuar në Tokyo në mes të dhjetorit, me rastin e 50-vjetorit të pranisë së Ferrarit në Japoni, ekzemplarët jashtë serie J50 që do të prodhohen janë vetëm dhjetë, të destinuar për dhjetë klientë fatlumë. I ndërtuar mbi bazën e modelit 488 Spider nga Departamenti i Projekteve Speciale dhe i projektuar nga qendra e dizajnit të brendshëm, nën drejtimin e Flavio Manzoni, modeli J50 interpreton me tone bashkëkohore, temën klasike të Ferrari-t, duke krijuar një “roadster” me çati të lëvizshme. Pjesa anësore përcaktohet nga dy linja kryesore: profili në fundin e dritares, i cili në një pikë të caktuar arrin në një linjë paralele me parafangon e përparme dhe linja e kanalit të bashkimit të elementeve, e cila ndan përgjysmë karrocerinë, tipike e traditës së Ferrari-t, nga modeli 308 deri tek F40. Nga modeli 488, J50 trashëgon konfigurimin mekanik, me motorin V8 në pozicion qendror, por që në këtë rast ofron deri në 690 kf, 20 më shumë se modeli nga i cili ka prejardhjen. Të dhjetë ekzemplarët e modelit J50, të cilët klientët do të mund t’i personalizojnë edhe më tej, janë të shitur. Gjatë epokës Marchionne, në të cilën do të shohim rritje të volumit të shitjeve, mbrojtja e ekskluzivitetit të markës, arrihet edhe me operacione të tilla.
Epa – BLINDOHEN LIMITET
EMËRIMI, i Scott Pruitt (foto), kundërshtar i pamëshirshëm i politikave mjedisore që udhëheqin EPA (Agjencia për Mbrojtjen e Mjedisit), i publikuar tek të gjitha gazetat në muajin dhjetor nuk ishte i papritur. Agjencia federale kishte zbatuar vetëm pak më parë një operacion strategjik parandalues: kishte nxitur procedurat e verifikimit të ndërmjetëm të objektivave të reduktimit të CO2 për periudhën 2022-2025, duke konfirmuar standardet e përcaktuara. Me pak fjalë, ajo i blindoi limitet para se administrata e re të ndryshonte rregullat e lojës. Në fakt, zgjedhja e Donald Trump ngre pyetje në lidhje me strategjitë e industrisë së makinave, që në prag të kthesës së saj më radikale, mund ta gjejë veten duke ecur në dy drejtime.
Chrysler – PACIFICA, E GJITHA ELEKTRIKE
I PARI model me emisione vërtetë zero, pjesë e grupit FCA (pas eksperimentit kalifornian të modelit 500E) ka pamjen e një mikrobusi. Chrysler Pacifica, modeli që u prezantua vitin e kaluar edhe në formën e hibridit plug-in, tani rishfaqet në CES (Consumer Electronics Show) të Las Vegas-it me një layout që i beson baterive dhe jo karburantit. Pararendësi i ri i “strategjisë së gjelbër”, i krijuar nga Sergio Marchionne, mund të pasohet nga një model me zero emisione, firmosur nga Maserati: burime brenda grupit konfirmojnë se Tridenti, siç kishte deklaruar më parë përgjegjësi teknik Roberto Fedeli, po punon për një sportive elektrike, por që do të ketë një performancë maksimale.
