Agresive, më e ngritur, dhe me performancë të lartë off-road. Shasi e përforcuar, pamje e frymëzuar nga vëllai i madh F-150. Praktikisht, unaza që mungonte mes nesh dhe Amerikës
Strukturë e njëjtë, muskuj të mirëformuar, shasi identike (ndonëse e përforcuar) dhe pamje yankee: modeli Raptor është një Ranger me stil amerikan. Është pothuajse aq i lartë dhe i gjerë sa F 150 – i bukur, por i pamundur për ne, për shkak të përmasave – dhe ndëkohë i ka të gjitha letrat në rregull për të të bërë për vete (duke lënë mënjanë çmimin). Megjithatë, i vendosur pranë më të shiturit në Europë (bëhet fjalë për versionin normal të Rangerit), fiton pa ndonjë lodhje, nëse flitet për anën estetike. Kjo për shkak se është i guximshëm, ka aks 30% më të ngritur, parafango më të gjera, kalandër spikatëse dhe pamje agresive: amerikanizmi i buron nga të gjitha poret dhe për këtë arsye do të jetë shumë i lakmuar. Balestrat e pasme (që shërbenin për ngarkimin) janë hequr dhe fokusi është përqëndruar tek amortizatorët me performancë më të lartë, duke fituar kështu cilësitë e një makine të vërtetë off-road. Më të mëdhenj këndet dhe aftësia për të kaluar pengesa (850 mm). Frena me disk, në vend të tamburëve të pasëm.
ASNJЁHERЁ I PA VEND
Zemra e modelit Raptor mbetet e njëjtë: një motor dy litërsh me katër cilindra, me turbinë të dyfishtë, me 213 kf dhe 500 Nm. I vogël si kubaturë, duke pasur parasysh peshën dhe përmasat, por gjithsesi performanca mbetet, sidomos jashtë rruge. Atje, modeli Raptor befason, sepse kambio automatike me dhjetë marshe funksionon mrekullisht dhe gjashtë modalitetet e drejtimit, të trashëguara nga F150, e bëjnë një “alpinist” të lindur. U provua në Marok, në kushte ekstreme dhe befasoi me mënyrën se si sillej në çdo terren. Ai dozon çdo kf deri në përsosje dhe ka rreze të rëndësishme me terrenin që kurrë nuk e prek, edhe në rrugë të paasfaltuara, ndërsa duket sikur ecën në rrugë shtetërore duke dhuruar ndjesi sikur të jesh i ulur në kolltuk. E bukura është se në asfalt nuk kërkon shumë sakrifica dhe është i heshtur. Vetëm gomat, mjaft agresive, ndikojnë tek saktësia e drejtimit, por më pak se sa pritej. Në aspektin e komfortit, është makinë në të gjitha aspektet: pa çelës, me klimatizator dyzonësh, Sync3 me ekran me prekje 8 inç, fenerë kseno, pajisje për ruajtjen e korsisë, frenim emergjent, pajisje cruise control aktive dhe shumë më tepër se kaq. Vetëm një është detaji jo i yankee: kur zhyt këmbën në gaz, nuk ndihet breshëria e Nm-ve, siç ndodh rëndom tek modelet amerikane. Nisja është e mirë, sepse kambio është e shpejtë në futjen e marshit të duhur, pra të shkurtër, por nuk ka trup të madh dhe motori ulërin. Gjithsesi, mbase kjo është e vetmja mënyrë për t’u ndjerë nga pak amerikan.