Kolaudimet e fundit në rrugë për versionin e gjatë të SUV-it gjerman, e pajisur me shtatë vende, që do të debutojë në gjysmën e dytë të vitit
Allspace 2.0 TDI
MOTORI – L4 turbobenzinë 1.984 cm3
FUQIA MAKSIMALE – 132 kW (180 kf)
MOMENTI PËRDREDHËS – 320 Nm në 1.500 xhiro/min
TRAKSIONI – integral
KAMBIO – automatike me 7 marshe
0-100 km/h – i papërcaktuar
KONSUMI MESATAR – i papërcaktuar
PËRMASAT – gjat. 470 – gjer. 184 – lart. 166 cm
PESHA – e papërcaktuar
ÇMIMI – i papërcaktuar
E RE NЁ DEBUTIMIN e saj në Sallonin e Detroitit, versioni i gjatë – modeli Allspace – i Volkswagen Tiguan, u pa në rrugët e Afrikës së Jugut, gjatë kontrolleve të fundit lidhur me përballimin e klimës së nxehtë. Protagonistë ishin prototipa, të përfunduar deri në detajet e fundit, si në versionin e destinuar për tregun europian (ku do të vijë vetëm pas stinës së verës), ashtu edhe për atë amerikan, me motor të njëjtë, dylitërshin TSI 180 kf, por të ndryshëm për sa u përket transmisioneve: dual clutch për Europën dhe varianti klasik automatik për Amerikën, ku friksioni i dyfishtë nuk pëlqehet edhe aq. Në të dyja rastet, Tiguani “i gjatë” shpalos përshpejtim jo fort emocionues, por gjithmonë shumë progresiv. Edhe sjellja në rrugë dëshmon të jetë e qetë me reagime graduale dhe lehtësisht e manovrueshme, edhe në rastet kur aderenca me tokën është e kufizuar. Në rrugë të pashtruara, makina duket se i ka përballuar ndryshimet e përmasave pa më të voglin problem: asnjë zhurmë parazitare (kjo gjë të jep një ndjesi qetësuese), asnjë reaksion i bezdisshëm në sistemin e drejtimit. Zgjatja e hapit me 11 cm më shumë se modeli klasik Tiguan, i ka lejuar edhe një rresht të tretë sediljesh. Hyrja në të është lehtësuar ndjeshëm falë përmasave më të mëdha dhe mbi të gjitha falë sediljeve qendrore mbi shinë me rrëshqitje. Por, dalja mbetet disi problematike dhe kërkon fleksibilitet në lëvizje. Sidoqoftë, në konfigurimin pesëvendësh, rritja e përmasave (gjatësia totale rritet me 22 cm) dhuron jo pak kapacitet shtesë (115 litra) për bagazhin, i cili është i rregullt dhe ka koeficient të lartë shfrytëzimi. Siç e përmendëm, në Europë, Tiguan Allspace do të jetë në treg në gjysmën e dytë të vitit, me traksion te rrotat e para vetëm për modelet bazë (ato me motor 1.4 benzinë dhe TDI 2.0 me 150 kf) dhe modelin 4Motion, që përveç këtyre do të kombinohet edhe me motorin dy litra benzinë (180 dhe 220 kf) si dhe me motorët turbodiesel 190 dhe 240 kf.
DIÇITURA:
Versioni Tiguan Allspace për tregun amerikan i fotografuar gjatë testimeve për përballimin e të nxehtit dhe rrugëve të pashtruara në Afrikën e Jugut
Në kroskot ndodhet ekrani me prekje 8 inç (pajisje në seri), me funksion mirror, edhe për navigatorin e telefonit smartphone. Instrumenti virtual Active info display është në dispozicion si opsional vetëm për versionin Business (duke filluar nga 660 euro)
Allspace dallohet nga një Tiguan “normal” nga përmasat më të mëdha të dyerve të pasme si dhe nga linja e ndryshme e dritares së tretë anësore. Ndryshime të vogla vërehen edhe në pjesën e përparme, në prerjen e kofanos dhe formën e kalandrës
VW TIGUAN 1.6 TDI
Duke zgjedhur versionin më të vogël turbodiesel, mund të kursehen 3.800 euro, pa bërë shumë sakrifica
1.6 TDI Style
MOTORI – L4 turbodiesel 1.598 cm3
FUQIA MAKSIMALE – 85 kW (116 kf)
MOMENTI PËRDREDHËS – 280 Nm në 1.700 xhiro/min
TRAKSIONI – në rrotat e para
KAMBIO – manuale me 6 marshe
0-100 km/h 10,9 s
KONSUMI MESATAR – 20,8 km/l
PËRMASAT – gjat. 449 – gjer. 184 – lart. 163 cm
PESHA – 1.795 kg
ÇMIMI – 29.000 €
DISA MUAJ pas mbërritjes së Tiguan-it të ri, debutoi versioni me motor 1.6 TDI. Ai i bashkëngjitet motorit 2.0 TDI dhe synon çmim më të leverdishëm, pa bërë shumë sakrifica. Dy variantet Style dhe Business, në fakt, janë të pajisur mirë. Tek të gjitha makinat është i pranishëm ekrani me prekje 8 inç – me aplikacione për të integruar telefonin smartphone dhe navigatorin Google, – kontrolli automatik i klimës dhe shfryrëset e pasme. Për të ndihmuar drejtimin, nuk mungojnë pajisjet si front dhe lane asist, frenimi automatik dhe ndërhyrja në timon për ta mbajtur makinën në korsinë e saj. Për sa i përket motorit, nuk ka asgjë për t’u ankuar. Përveç fuqisë 116 kf, e përshtatshme për një makinë familjare, momenti përdredhës 280 Nm, lejon drejtim të zhdërvjellët në të gjitha situatat, ose, të paktën, pa shqetësime. Nuk pritet të jetë e shkëlqyer nëpër rrugët malore e në të përpjeta, por sidoqoftë ecën mirë, pa e sforcuar kambion manuale me gjashtë marshe. Kambio Dsg me motor 1.6 TDI nuk është i disponueshëm dhe as traksioni integral (të dyja këto janë zgjedhje të rezervuara për cilindrata më të mëdha). Krahasuar me modelin me motor 2.0 TDI, me traksion në rrotat e para dhe me të njëjtat pajisje, kursehen 3.800 euro. Çmimi nis nga 28.750 euro, ndërsa oferta debutuese është 26.500 euro, pa pasur nevojë për oferta shtesë.