AutoClub

PRANVERË E SIGURT, VERA VJEN ME ADRENALINË

Edhe këtë vit mbyllëm një edicion të suksesshëm në shërbim të përdoruesve të rrugës. “Të Sigurt mbi Dy Rrota” është Konkursi Kombëtar që nisi vetëm në një qytet dhe vetëm me 20 fëmijë, ndërsa tashmë mbylli edicionin e 9-të të tij, duke u zhvilluar në 11 qytete dhe me 1200 fëmijë të moshës 8-12 vjeç që edukohen, festojnë dhe garojnë mbi biçikleta.

Një program edukativ që mblodhi rreth vetes mijëra qytetarë, fëmijë, prindër etj. Konkursi ka në thelb edukimin e fëmijëve në përdorimin e biçikletave, njohjen me rregullat e qarkullimit, respektimin e tyre, si dhe promovimin e një ideje për ta bërë jetën dhe përdorimin e rrugës më të sigurt.

Nëse tetë vite më parë mund të kishte skepticizëm dhe vështirësi, ja ku jemi afërsisht një dekadë më pas. Breza që janë edukuar dhe kanë fituar nga ky program i Klubit të Automobilistëve Shqiptarë. Kemi kaluar përmes sfidash, pengesash dhe problemesh jo të pakta, por asnjëherë nuk jemi ndalur në ecjen përpara për zhvillimin, ndihmën dhe edukimin e qindra fëmijëve. Një projekt që po rritet dhe zhvillohet vit pas viti, ndërsa ne ndihemi krenarë për gjithçka kemi bërë. Sigurisht, angazhimi vazhdon dhe nuk do të ndalet. Asnjëherë…

Por, emocionet e forta sapo kanë nisur. Adrenalinë, ritëm, gara dhe sigurisht shumë pilotë. Jemi në prag të stinës së verës dhe spektakli i garave po troket. Këtë fundjavë do të nisë “Kampionati Kombëtar i Kartingut 2019”, një aktivitet ndjellës ku do të marrin pjesë dhjetëra pilotë dhe të pasionuar pas shpejtësisë dhe adrenalinës pa kufi. ACA ka bërë gjithçka gati për një edicion të suksesshëm dhe argëtues për të gjithë pjesëmarrësit dhe ndjekësit e garave.

“Karting 2019” është vetëm fillimi. Në shtator do të rikthehet gara ndërkombëtare Hill-Climb “Trofeu Skënderbej” në një sezon që do të jetë spektakolar dhe shumë tërheqës për t’u ndjekur. Itinerari është bërë, pilotët janë regjistruar dhe Klubi ka marrë të gjitha masat për një edicion që garanton emocione të forta dhe “zemrën në dorë” për ata që shijojnë adrenalinën e shpejtësisë.

Jemi vetëm në gjysmë të vitit, ndërsa garat dhe aktivitetet do të jenë të shumta deri në fund të 2019-s, me angazhimin për të bërë më të mirën për të gjithë përdoruesit e rrugës dhe sigurisht atyre që duan edhe emocionet dhe sfidat.

Megjithatë, pa ju lodhur shumë, për momentin mund të shijoni verën të qetë. Det, diell, argëtim dhe sigurisht, pak… shpejtësi. Një stinë e përkryer për pasionin, adrenalinën dhe shpërthimin emocional. Ne jemi gjithmonë aty!

Leave a Reply

Your email address will not be published. Required fields are marked *